sabaq II

Qaraqalpaqsha (kaa)

Morfologiyalıq hám sintaksislik qásiyetleri

atlıq, sa-baq

Leksikalıq mánileri

1. Kiyim hám basqa da nárselerdi tigiw ushıp arnalıp islengen jińishke jip. • Kendirdey jińishke sabaq esip, malaqayımnıń qulaǵın tigip aldım (J. Aymurzaev). • Oyın ústine qolına iyne alıp, sabaqtı jip ótkerip kórmegen, bir baw qamıs qırıqpaǵan, bir tal otın shappaǵan, janı pardozda ósken qız (K. Sultanov). • Ol qızıl, kók, sarı sabaqlar menen kestelengen oramalın jıynastırıp, shay qaynatıwdıń tátárrigine kiristi (Ó. Xojaniyazov).
2. Jińishke paqal, pálek. • Geyde bult astınan tuwlap shıqqan ay, sabaǵınan úzilgen sarı jambılshaday jarq etedi (K. Sultanov). • Isler kók talshıqlı tiri sabaqtan, Móldir suw betine órmegin shalıp (I. Yusupov). • Qolıńda endi ǵana sabaǵınan úzilgen aq hám qızıl reńli, xosh iyis tarqatıp turǵan roza gúllerinen jasalǵan gúldáste, al iyninde Versache modalar úyinde meniń buyırtpam menen tigilgen qımbat bahalı smoking (K. Kárimov). Sabaqqa iliniw — ómir-kúniniń tawsılıwı, ájelinin jetiwi. • Ǵarrı bir sabaqqa ilinip jatar edi (M. Nızanov).

Derekler

1. QARAQALPAQ TILINIŃ TÚSINDIRME SÓZLIGI. Jeti tomlıq. Nókis, «Qaraqalpaqstan» baspası, 2023-jıl.